/>
Таң 04:30 Күн 05:55 Бесін 13:00 Екінті 17:54 Шам 19:57 Құптан 21:22

БЕС УАҚЫТ НАМАЗДЫҢ ОҚЫЛУЫ - ТАҢ НАМАЗЫ

24/05/2017 171174 67 Muftyat.kz

БЕС УАҚЫТ НАМАЗДЫҢ ОҚЫЛУЫ

Намаздың толық және діни үкімдерге сай болуы үшін парыздарын, уәжіптерін және сүннеттерін орын-орнымен орындап, намаздарды бұ-затын және мәкрүһ нәрселерден сақ болу керек.

ТАҢ НАМАЗЫ

Екі сүннет, екі парыз – барлығы төрт рәкағат. Алдымен сүннет, содан кейін парыз оқылады.

Таң намазының сүннетінің оқылуы:

Бірінші рәкағат:

1) Аяқтардың арасы төрт елі болатындай ашық және башпайлардың ұшы құбыла жаққа қарау керек.

Ниет:

2) “Ниет еттім Алла разылығы үшін бүгінгі таң намазының сүннетін оқуға” деп ниет етіледі.

Ифтитах тәкбірі:

3) “Аллаһу әкбар” деп ифтитах тәкбірі айтылады.

(Ер адамдар тәкбір айтқанда, алақандары құбылаға қарайды, саусақтарының арасы шамалы ашық болады. Бас бармақтар, құлақ ұшы-ның деңгейіне келетіндей қолдарын жоғары көтереді).

(Әйел адамдар тәкбір айтқанда, алақандары құбылаға қарайды, саусақтарының арасы шамалы ашық болады. Саусақтары көкірек дең-гейіне келетіндей қолдарын жоғары көтереді).

Қиям:

4) Тәкбірден кейін қолдарын байлайды. Тік тұрғанда сәжде қылатын жерге қарайды.

(Ер адамдар оң қолының алақаны сол қолының үстінде және оң қолының бас  бармағы мен кішкентай саусақтары сол қолының білегін қапсырып, қолдарын кіндігінің астына байлайды).

(Әйел адамдар оң қолын сол қолының үстіне қойып және қолда-рын көкірегінің үстіне байлайды).

Қирағат:

5) Түрегеп тұрғанда рет-ретімен: а) Субханәкә; ә) Әғузу – бисмиллаһ; б) Фатиха сүресі; в) Құраннан бір сүре оқылады.

Рүкуғ:

6) “Аллаһу әкбар” деп рүкуғқа еңкейіп, үш рет “сүбханә раббил-азим” делінеді. Рүкуғтан тұрғанда аяқтардың ұшына қарайды.

(Ер адамдар рүкуғта саусақтарын ашып, алақанымен тізелерін ұстайды, арқасы түп-түзу болуы керек. Тізелері мен шынтақтарын түзу ұстайды).

 (Әйел адамдар рүкуғта иықтарын біраз иіп, ер адамдарға қарағанда біраз иіліңкіреп тұрады. Саусақтарын ашпай, қолдарын тізелерінің үстіне қояды әрі тізелерін біраз бүгіп тұрады).

Рүкуғтан тұру:

7) “Сәмиға Аллаһу лимән хамидәһ” деп рүкуғдан тұрады, тік тұрып “Раббәнә ләкәл хамд” дейді.

Сәжде:

8) “Аллаһу әкбар” деп сәждеге барады. Сәждеге барарда алдымен тізе, қол, содан кейін маңдай және мұрын жерге тиеді. Сәждеде бас екі қолдың арасында және бірдей деңгейде болады. Сәждеде болғанда екі аяқ көтерілмейді, мұрынға қарайды. Үш рет “сүбхана раббил-ағлә” дейді.

(Ер адамдар сәждеде шынтақтарын бүйірінен ұзақ және білектерін жерден жоғары ұстайды. Аяқтары башпайлардың үстінде тік ұсталып, башпайдың ұштары құбыла жаққа қарайтындай етіп қойылады).

(Әйел адамдар сәждеде қолдарын бүйіріне жабыстырып, аяқтарын башпайлардың үстіне тік ұстап, башпайларының ұштарын құбыла жаққа қарайтындай етіп қояды).

Екі сәжде арасындағы отырыс:

9) “Аллаһу әкбар” деп басын көтеріп тізерлеп отырады. Отырған кезде саусақтарын тізенің деңгейіне келетіндей сандарының үстіне қояды және сәжде орнына қарайды. Бұл кезде “сүбханалла” дейтіндей аз ғана уақыт отырады.

(Ер адамдар сол аяғын жерге төсеп, үстіне отырады, оң аяқ башпай-лары құбылаға қарайтындай тік ұсталады).

(Әйел адамдар аяқтарын жатқызып, оң жаққа қарай созып отыра-ды).

10) “Аллаһу әкбар” деп екінші рет сәждеге жығылады және үш рет “сүбхана раббил -ағлә” дейді.

11) “Аллаһу әкбар” деп сәждеден екінші рәкағатқа тұрып қолын байлайды. Сәждеден  көтерілгенде әуелі бас, содан кейін қолдар, сонан соң қолдарын тізеге қойып тізелерін жерден көтереді.

Ифтитах тәкбірінен бастап осы жерге дейін  жасалғандар “бір рәкағат” болып есептеледі.

Екінші рәкағат:

1) Түрегеп тұрғаннан кейін рет – ретімен: а) Бисмиллаһ ә) Фатиха сүресі; б) Құраннан бір сүре оқылады.

2) Бірінші рәкағаттағыдай “Аллаһу әкбар” деп рүкуғқа барады да үш рет “сүбхана раббил – азим” дейді.

3) “Сәмиғаллаһу лимән хамидәһ” деп тұрады, толық тік тұрғаннан кейін “Раббәнә ләкәл хамд” дейді.

4) “Аллаһу әкбар” деп сәждеге жығылады да үш рет “сүбхана раббил -ағлә” дейді.

5) “Аллаһу әкбәр” деп сәждеден тұрып тізерлеп отырады. “Сүбханаллаһ” дейтіндей уақыт отырады.

6) Содан кейін “Аллаһу әкбар” деп екінші рет сәждеге жығалады да, үш рет “сүбхана раббил -ағлә” дейді.

Намазда соңғы отырыс:

7) “Аллаһу әкбар” деп сәждеден басын көтеріп отырады. Отырған кезде қолдың саусақтарын тізенің деңгейінде келетіндей санның үстіне қояды да, алдына қарайды.

(Ер адамдар сол аяғын жерге төсеп үстіне отырады, оң аяқтың сау-сақтарын құбылаға қаратып, тік ұстайды) .

(Әйел адамдар аяқтарын жатқызып, оң жаққа қарай созып отыра-ды).

8) Отырған кезде рет-ретімен: а) “Әттәхияту” ә) “Аллаһүммә салли” б) “Аллаһумма барик” в) “Раббәнә әтинә...” дұғалары оқылады.

Оң жаққа сәлем беру:

9) Әуелі басын оң жаққа бұрып “Әссәләмү алейкүм уә рахмәтуллаһ” дейді. Сәлем берген кезде иығына қарайды.

Сол жаққа сәлем беру:

10) Содан кейін басын сол жаққа бұрып “Әссәләмү алейкүм уә рахмәтуллаһ” дейді. Осылайша екі рәкағат намаз аяқталады.

Таң намазының парызының оқылуы:

Таң намазының парызы да екі рәкағат сүннеті сияқты оқылады. Сүннеттен айырмашылығы парыз үшін ниет етіліп, ер адамдардың қамат айтуында.

Таң намазының парызына былай ниет етеді:

“Ниет еттім Алла разылығы үшін бүгінгі таң намазының парызын оқуға”.

Пікірлер

Галымжан | 24/07/2017

Ассалаумагалейкум!!Мен Шымкент каласында турамын.Тан намазын тангы сагат 7 де окысам дурыс боладыма?

Сайт әкімшілігі | 27/07/2017

Уағалейкум әссалам! Шымкент қаласының намаз уақыттарын сайттан көруге болады. Сілтеме: http://www.muftyat.kz/kz/namaz_times

Айнұр | 10/11/2017

Ассаламуалейкум алматыда таң намазы 06:17де күннің шығуы 07;36да кейде намазға ұйықтап қалам соны күн шығуынан кейінде оқысам болама? Мысалы; 07:45те немесе 08:10 деген сияқты

Сайт әкімшілігі | 23/01/2018

Уағалейкум әссалам. Намазды өз уақытында оқу қажет. Уақытында оқылмаған намаз қаза болады. Себепсіз намазды қаза етуге болмайды. 

Гулшат | 21/11/2017

Таң намазын азан айтылған сонба айтылмай турып оку керекпе?

Сайт әкімшілігі | 23/01/2018

Азан айтылғаннан кейін оқу қажет

Айгерим | 10/03/2018

Ассаламуалейкум! Таң намазы уакыты 6:26 да басталып, 7:40та Кун деп берилген. 7:38 де намазды окып биттим. Бул уакытында окуга болатын ба еди? Кайта оку керек пе?

Сайт әкімшілігі | 17/05/2018

Уағалейкум әссалам. Болады

Нурайна | 30/03/2018

Саламатсызба! Тан намазына кандай сурелер окылады?

Сайт әкімшілігі | 17/05/2018

Әрбір рәкағатында "Фатиха" сүресі мен кез келген сүре оқуға болады.

Батырхан | 07/05/2018

Тан намазын окып болдым одан кеин Кун окылама алде? Тусинбедим

Сайт әкімшілігі | 17/05/2018

Күн деген күннің шығуын білдіреді. Ол намаз емес. Күннің шығуымен таң намазының уақыты аяқталады